علاش وكيفاش ..تعيش ب 20 درهم فالنهار وماتتسماش فقير

الأربعاء 07 فبراير 2018 - 19:28

أي مواطن مغربي كيتبع الأحداث والأخبار اللي كتنشر فالصحافة سواء الإلكترونية ولا المكتوبة غادي يكون من السهل عليه يعرف باللي المغرب هو البلد الوحيد اللي يقدر فيه وزير أو برلماني أو أي مسؤول سياسي كيفما كان يعطي تصريح يقول فيه اللي بغا وكيفما بغا..

والأمثلة على هادشي كثيرة بزاف..ولكن آخر وحدة هي ماللي خرجات وزيرة الأسرة والتضامن والمساواة والتنمية الاجتماعية بسيمة الحقاوي بتصريح كتقول فيه باللي الأسرة اللي كتصور 20 درهم فالنهار مايمكنش نسميوها أسرة فقيرة..

هاد التصريح شعل مواقع التواصل الاجتماعي، وقسم المغاربة مابين ناس اللي شافو أن هاد التصريح عادي، حيث بالفعل كاينين أسر كيعيشوا ب20 درهم فالنهار، وهنا شافو هاد المغاربة بأن مفهوم العيش كيوقف عند نقطة أن الواحد يقدر يوفر من هاد المبلغ المالي قوت اليوم ديالو اللي غادي يحفظ ليه الاستمرارية فالحياة، وهادشي بطبيعة الحال غادي يكون بأبسط مايمكن أن يوفره من المواد الغذائية، يعني ماعندوش الحق فبزاف ديال الاختيارات، وزيد على هادشي أن شي وحدين قالو باللي كاينة أسر كتعيش بأقل من 10 دراهم فاليوم، وتعطات أمثلة لساكنة دور الصفيح مثلا اللي كتلقا أن الأسرة مكونة من 6 أفراد أو أكثر، والأب أو الأم بوحدهم كيتقاتلو باش يجيبو 50 درهم فالنهار وكتتقسم كمصروف على هاد الأسرة، اللي ماشي فاستطاعتها الولوج لا للخدمات الصحية ولا التعليم لدرجة أن هؤلاء الآباء كيلقاو صعوبة فأنهم يشريو لوليداتهم الكتب والمقررات اللي غادي يحتاجوها فكل سنة، وهنا بلا منهضرو على شي حاجة سميتها توفير تغذية صحية أو اللباس وغيرها من أبسط متطلبات الحياة.

وفالمقابل ديال هاد الرأي كاينة واحد الشريحة من المغاربة اللي بان ليها أن عشرين درهم ماتكفيش الإنسان حتا لأنو يوضع حد لحياتو، وأن هاد عشرين درهم كيفاش ممكن للإنسان مثلا يعيش بيها، واش يوفر منها أجرة الكراء ؟أو التطبيب؟ أو تمدرس الأبناء؟ وكاين فيهم اللي قال باللي هاد 20 درهم ماتقدرش حتا تشربك قهوة فبلاصة اللي نتا تختارها، وهنا بلا مانهضرو على الناس اللي شبعو فالوزيرة سبان واعتابرو أنها غير داوية وصافي.

ومابين الناس اللي قالوا أن هاد 20 درهم تقدر تعيش الإنسان فالنهار والناس اللي اعتابروها نكتة كبيرة بقا السؤال الكبير هو التحديد ديال المعنى ديال الفقر عند كل واحد ؟ تم أشنو هوما المعطيات اللي بنات عليهم الوزيرة باش عطاتنا هاد التصريح اللي خلق ضجة كبيرة في الأيام القليلة الماضية؟ وأشنو هو التعريف اللي عند الوزيرة للفقر؟ ..فالحقيقة بغينا أجوبة على هاد الأسئلة..