وا شد الصف

الثلاثاء 02 أكتوبر 2018 - 10:36

قبل ما تمشي لأي إدارة بصفتك مرتفق كتبقا تفكر فالفوضى والتأخير الكبير اللي غادي تكون معرض ليهم ، وأنك عوض ما تقضي الغرض اللي نتا ماشي على قبلو لهاديك الإدارة فواحد 10 دقائق كتولي معطل جميع المصالح ديالك لساعات طويلة.

هاد الفوضى والتأخير كيكون جزء كبير من المسؤولية فيهم كيتحملوه المواطنين أي المرتفقين اللي أولا ماكيحتارموش بعضهم، فمثلا تقدر نتا تكون كتتسنا لوقت طويل، ويجي واحد من موراك ويدخل نيشان عند الموظف بلا مايدير لك أي اعتبار وإلا كان فيه شوية الصواب يقدر يقولك سمح ليا أنا راني باغي غير نسول بسرعة ويدخل ويقاد شغلو ويخليك نتا منشور كيحساب لك شاد الصف ونتا راك غير كتضيع وقتك.

وكاين شي إدارات عاود فيهم كارثة أخرى تلقا مثلا كاينة الآلة اللي كتنظم وصولك لخدمات هاديك الإدارات وكل مصلحة فيها تلقاها كتدوز الناس بالترتيب، ولكن ورغم ذلك كيجي هاديك أولا هاديك اللي باغي يخرق النظام ويدوز هو الأول وكأنه هو بوحدو اللي زربان وعندو مشاغل ومخلي ولادو بوحدهم ولا مسطاسيوني "دوزييم بوزيسيون" ولاخرين كاملين اللي شادين الصف من قبل منو غير مسالين ولا يمكن ماشيين يدوزو جزء من الكونجي ديالهم فهاديك الإدارة.

هاد اللاحترام لبعضياتنا أولا بالمعنى الصحيح هاد الاستغباء لذكاء الناس راه تيخلينا كاملين ديما معطلين، وكيخلي حتا الموظفين يستغلوا هاد النقطة ويزيدوا فتعطالهم ويبقاو يتماطلو ويتعمدوا أنهم يخليو كلشي منشور، فقط لأنهم مقتانعين بأن اللي قدامهم هوما أناس ماعارفينش لا حقوقهم ولا واجباتهم، ومكايحتارموش بعضهم من الأصل.

هاد السلوك البسيط ديال احترام الصف فأي إدارة وأي محل دخلنا ليه وحتا ماللي نكونوا فشي متجر ونبغيو نخلصو مثلا راه كيسهل حياتنا وكيبين على تحضرنا واحترامنا لبعضنا البعض، لأن دقيقة انتظار في نظام وانتظام أحسن بكثير من ساعات من الفوضى والأنانية ديال كلنا باغين نقضيو نفس الغرض فنفس الوقت.